Mandatu xefe suku to tinan hitu

Dili-estrelaonline– Lei Nú 9 2016 kona-ba eleisaun suku estabelese regras hirak kona-ba eleisaun direta ba Xefe Suku sira iha Timor-Leste, inklui hatúr provizaun hirak ne’ebé regula kona-ba kompetensia ba Konsellu Sukus sira, mandatu ba Xefe Sukus sira ne’ebé sei eleitu ba tinan Hitu (7) no bele renova ba dala ida tan.

Lei dos suku mós define kona-ba forma designasaun ba membrus Órgauns Suku sira ne’ebé sei halo mós eleisaun ba delegadus Aldeias ba Konsellu Sukus sira nian.

Xefe Aldeias sira sei eleitu liu husi Asembleia de Aldea, sufrájiu, universal, livre no direto, secreto e pessoal. Nune’e Xefe Aldeias sira sei la eleitu direta husi povu maibe liu husi Asembleia de Aldea.

S.E.Prezdente da Republika nia promulgasuan ba lei suku ne’e, hanesan resposta ida ba preukupasaun publiku nian kona-ba eleisaun suku. Governu publika tiha ona iha jornal da republika signifika lei ne’e em vigor ona.

Relasiona ho ne’e, Governu liu Husi Ministeriu Administrasaun Estatal ho prezensa S.E.Ministru Estadu Koordenadór Asuntus Administrasaun Estadu no Justisa Dionisio Babo Soares no S.E.Vise Ministru Administrasaun Estatal Sr.Tomas Cabral hodi hala’o sorumutu iha loron (22 jullu 2016) iha salaun STAE Nasionál Dili hodi sosializa lei suku ba administrador munisipiu no mos administrador du postu sira kona-ba prosesu eleisaun inklui nesisidade lojistika ba eleisaun suku.

S.E.Vise Ministru Administrasaun Estatal Sr. Tomas Cabral husu Administrador sira atu kompriende ho detallu lei suku hodi bele ajuda orienta prosesu eleisaun suku ne’ebé sei lao simultaniamente iha aldeia (2,225) iha Teritoriu Timor-Leste.

Lideransa komunitariu ka konsellu du suku mak sei organiza hahu husi elaborasuan modelu bulletin de votus, enkontru komunitariu ba prosesu nomeasaun kandidaturas,simu reklamasaun no halo validasaun ba prosesu eleisaun suku.

Iha tempu hanesan, governante ne’e mos insiste administrador du postu sira atu identifika Estrada rurais ne’ebé labele asesu ho transporte no mos area ne’ebé seida’uk asesu ba elektrisidade hodi informa imediata ba ministeriu Administrasaun Estatal atu nune’e bele kordena ho autoridade kompetente hodi buka solusaun .

Ministeriu Administrasaun Estatal sei lori proposta kalendariu Eleisaun (17 Setembru 2016) no mos orsamentu eleisaun suku nian ba konsellu ministru hodi bele aprova molok ezekuta eleisaun suku.

STAE nu’udar orgaun eleitoral ida iha papel atu halo submisuan kalendariu eleisaun,fornese baze de daus eleitoral,sosializasaun lei suku,halo edukasaun votantes no mos formasaun ba meza eleitoral.
“Iha kontextu eleisaun suku STAE sei fó apoiu formasuan atu bele ajuda realizasaun eleisaun suku la’o ho susesu” tenik Diretor Jeral STAE Sr.Acilino Manuel Branco.

Além de ne’e, Adjunta Diretor Geral STAE Sra.Tulia Onorina de Jesus Andrade rekonese kooperasaun ho USAID nia Projetu ba Distrito konsege prepara tiha ona Manual Formasaun ba Eleisaun suku no mos Materia Publikasaun ne’ebé preparadu tiha ona atu bele ajuda fo kapasitasuan ba konsellu do suku, hodi halao eleisuan no mos ajuda halo publikasuan hodi enkoraza feto,joven no mos ema ho defisiensia hodi tuir resensiamentu no mos eleisaun. (Media STAE/charly)

Leave a Reply

Your email address will not be published. Required fields are marked *